இலங்கை அணிக்கெதிரான டெஸ்ட்: முதல்நாள் முடிவில் மே.தீவுகள் 287-7

இலங்கை மற்றும் மேற்கிந்திய தீவுகள் அணிகளுக்கிடையிலான இரண்டாவது டெஸ்ட் போட்டியின், முதல்நாள் ஆட்டம் நிறைவுக்கு வந்துள்ளது.

இதன்படி நேற்றைய ஆட்டநேர முடிவில், முதல் இன்னிங்ஸிற்காக துடுப்பெடுத்தாடிவரும் மேற்கிந்திய தீவுகள் அணி, 7 விக்கெட்டுகள் இழப்புக்கு 287 ஓட்டங்களை பெற்றுள்ளது.

ஆட்டநேர முடிவில், கிரைஜ் பிரத்வெயிட் 99 ஓட்டங்களுடனும் ராகீம் கோர்ன்வோல் 43 ஓட்டங்களுடனும் களத்தில் இருந்தனர்.

ஆண்டிகுவா மைதானத்தில் நேற்று (திங்கட்கிழமை) ஆரம்பமான இப்போட்டியில், நாணய சுழற்சியில் வெற்றிபெற் இலங்கை அணி, முதலில் களத்தடுப்பை தீர்மானித்தது.

இதன்படி முதலில் துடுப்பெடுத்தாடிய மேற்கிந்திய தீவுகள் அணி, நேற்றைய ஆட்டநேர முடிவில், 7 விக்கெட்டுகள் இழப்புக்கு 287 ஓட்டங்களை பெற்றது.

இதன்போது ஜோன் கெம்பல் 5 ஓட்டங்களுடனும், போனர் ஓட்டமெதுவும் பெறாத நிலையிலும், கெய்ல் மேயர்ஸ் 49 ஓட்டங்களுடனும் பிளக்வுட் 18 ஓட்டங்களுடனும் ஜேஸன் ஹோல்டர் 30 ஓட்டங்களுடனும் ஜோசுவா டா சில்வா 1 ஓட்டத்துடனும் அல்சார்ரி ஜோசப் 29 ஓட்டங்களுடனும் ஆட்டமிழந்தனர்.

இலங்கை கிரிக்கெட் அணியின் பந்துவீச்சில், சுரங்க லக்மால் 3 விக்கெட்டுகளையும் விஷ்வ பெனார்டோ, லசித் எம்புல்தெனிய, துஷ்மந்த சமீர மற்றும் தனஞ்சய டி சில்வா ஆகியோர் தலா 1 விக்கெட்டினை வீழ்த்தினர்.

இன்னமும் 3 விக்கெட்டுகள் வசமுள்ள நிலையில், போட்டியின் இரண்டாவது நாளை, மேற்கிந்திய தீவுகள் அணி இன்று தொடரவுள்ளது.